Slær niður veggi í HSÍ eftir við­burða­ríkan fyrsta mánuð í starfi

Evrópumótið er frá og Sólveig er farin að láta verkin tala á skrifstofu HSÍ sem undirgengst nú mikla yfirhalningu, veggir eru slegnir niður og rými opnuð, starfsstöðvar starfsfólks og landsliðsþjálfara betrumbættar.

„Við vorum að hugsa hvernig við getum sameinað okkur aðeins,“ segir Sólveig í samtali við íþróttadeild Sýnar. „Við þurfum að vinna vel saman, erum eitt lið og það er gott að geta þá ráðfært sig við samstarfsfólk. Ég þarf líka svolítið mikið á því að halda, að geta spurt mikið af spurningum og að geta þá verið með stórt rými þar sem að við fundum, við þurfum einhvern veginn að draga alla að borðinu, vera stærri og hugsa til framtíðar. Þá er gott að geta dregið fólk að borðinu.“

Staðan þung

Sólveig kemur ekki blaut á bakvið eyrun í starf hjá HSÍ, reynsla hennar úr íþróttahreyfingunni er mikil og það nýtist vafalaust vel því rekstur sambandsins hefur verið þungur um hríð og á sama tíma eru landslið Íslands, bæði í karla og kvennaflokki að fara á hvert stórmótið á fætur öðru.

„Við þurfum að fara í þjóðarátak. Við erum með rosalegt afreksfólk sem er að leggja sitt af mörkum á hverjum einasta degi, við erum með starfsfólk sem er með hjartað í þessu á hverjum einasta degi. Við þurfum líka að geta einhvern veginn mætt öllu þessu og vera áfram í þessu sæti sem við erum búin að skapa okkur og búa til á elju fortíðarinnar. Við ætlum að hugsa til framtíðar, þá kostar það og ef okkur langar að vera leiðandi til framtíðar þá verðum við eitthvað að gera. Því það er í raun stórmerkilegt hvað hefur verið gert fyrir ekki meiri pening. Það er held ég af því að fólkið er með hjartað í þessu.“

Verður spennandi að setja HM miðasöluna í gang

Aðeins fimm ár eru síðan til stefnu þar til halda á riðil á HM karla hér heima á Íslandi í nýrri þjóðarhöll sem þarf að vera risin ef af á að verða.

„Þjóðarhöllin verður risin og þetta verður geggjað. Það verður spennandi að setja miðasöluna í gang.“

Hvernig skynjarðu hljóðið gagnvart þessu verkefni, er allt komið á blússandi gang hvað þetta verkefni varðar?

„Ég veit ekki meira heldur en aðrir. Ég hef ekki neitt annað en trú á fólkinu sem er búið að vera berjast fyrir þessu öll þessi ár. Ekki neitt nema trú.“

Þannig áhyggjur eru óþarfar hvað þetta varðar?

„Sjáum til.“