Dramatísk endur­koma Stjörnunnar felldi Sel­foss

Ljóst var fyrir leikinn í Hafnarfirði að sigur Hauka myndi fella Stjörnuna sama hvað. Stjarnan og Selfoss voru jöfn að stigum á botninum fyrir leiki dagsins en Selfoss mætti ÍR í Breiðholti.

Neðsta lið deildarinnar fellur um deild en það næstneðsta fer í umspil um áframhaldandi sæti. Selfoss var með innbyrðis viðureign á Stjörnuna og ljóst að Stjarnan þyrfti að fá fleiri stig en Selfyssingar til að komast upp í umsspilssætið.

Selfoss átti í miklum vandræðum í Breiðholti og snemma ljóst að ÍR ynni þann leik. Honum lauk 33-20 fyrir ÍR og Selfyssingar þurftu þá að treysta á að Stjarnan tapaði fyrir Haukum.

Lengi vel stefndi í Haukasigur á Stjörnunni en Haukakonur leiddu 17-11 í hálfleik. Mest höfðu Haukar komist sjö mörkum yfir en eftir hléið mætti allt annað Stjörnulið til leiks sem var sannarlega að berjast fyrir lífi sínu.

Stjarnan hjó jafnt og þétt á forskot Hauka og þegar tíu mínútur voru eftir af hálfleiknum var staðan 23-22 fyrir Haukakonur. Stjarnan hafði því skorað 12 mörk gegn aðeins fimm á fyrstu tuttugu mínútum síðari hálfleiks.

Stjörnunni tókst að jafna en Haukar svöruðu. Staðan 26-24 fyrir Hauka þegar tvær mínútur voru eftir.

Sara Katrín Gunnarsdóttir minnkaði muninn í 26-25 og Stjarnan náði góðu stoppi í vörninni í kjölfarið. Gestirnir fóru svo upp í lokasóknina og þegar aðeins fjórar sekúndur voru eftir skoraði hin færeyska Inga Maria Roysdóttir jöfnunarmarkið sem tryggði Stjörnunni umspilssæti.

Selfoss fellur því í næstefstu deild en von Stjörnunnar um áframhald í deild þeirra bestu lifir.