Ís­lenskættaða goð­sögnin hættir 44 ára að aldri

Frá þessu greina danskir miðlar og segja að þar með sé einn besti landsliðsmaður Danmerkur frá upphafi endanlega hættur.

Lindberg á íslenska foreldra, þau Tómas Erling Lindberg heitinn og Sigrúnu Sigurðardóttur sem bæði léku handbolta með FH, en er fæddur og uppalinn í Danmörku.

Hann hætti í danska landsliðinu fyrir tveimur árum, eftir að hafa meðal annars unnið HM tvisvar, EM tvisvar og Ólympíuleikana einu sinni, og er nú einnig hættur í félagsliðaboltanum eftir vægast sagt farsælan feril. Þessi magnaði hornamaður lék síðast með HÖJ Elite og verður nú yfirmaður íþróttamála hjá félaginu.

„Einn af þeim stærstu sem við höfum átt“

„Hans er einn af þeim stærstu sem við höfum átt. Á því leikur enginn vafi og hann hefur dregið þungan vagn í mörg ár, bæði með félagsliði sínu og ekki síst með landsliðinu,“ sagði Nikolaj Jacobsen, landsliðsþjálfari Danmerkur við Ekstra Bladet.

„Hann hefur verið hluti af stórkostlegu tímabili og langur ferill hans ber því vitni. Þetta er einstakur ferill með mörgum titlum. Hann hefur haldið út í mörg ár,“ sagði Jacobsen enda spannar ferill Lindberg meira en aldarfjórðung.

Lindberg náði að spila 308 landsleiki og skoraði í þeim 809 mörk. Þá er hann markahæstur í sögu efstu deildar í Þýskalandi með 3.115 mörk.

„Þetta er hárrétti tímapunkturinn fyrir mig til að hætta og takast á við nýja áskorun,“ segir Lindberg í tilkynningu um að hann sé hættur að spila til að taka við sem íþróttastjóri HÖJ Elite.

„Ég er glaður og stoltur af þeim ferli sem ég hef átt og ég er þakklátur fyrir öll þau mörgu augnablik sem ég hef átt. Ég hef reynt og afrekað meira en mig hafði nokkurn tíma dreymt um og ég vil þakka öllum sem hafa hjálpað mér og stutt mig bæði innan vallar sem utan,“ segir Lindberg.