Fimm hand­teknir og um mikið magn sterkra fíkni­efna að ræða

Mennirnir voru úrskurðaðir í gæsluvarðhald í Héraðsdómi Reykjavíkur til þriðjudagsins níunda júní á grundvelli rannsóknarhagsmuna að kröfu Lögreglunnar á höfuðborgarsvæðinu að því er fram kemur í tilkynningu.

Þar er einnig greint frá því að málið varði töluvert magn af sterkum fíkniefnum og að handtökur hafi farið fram í Reykjavík og Hveragerði. Málið sé enn í rannsókn og að það sé unnið í samstarfi nokkurra lögregluembætta, auk Tollgæslunnar.

Greint var frá því í gær að sérsveitin hefði verið kölluð til Hveragerðis og var mikill fjöldi lögreglumanna á bæði merktum og ómerktum bílum að athafnast á svæðinu fram eftir degi. Ekki liggur fyrir hvort að málin tengjast á nokkurn hátt og hyggst lögreglan ekki veita frekari upplýsingar um rannsókn málsins að svo stöddu.

Fréttin hefur verið uppfærð.