Oliver Tree látinn 32 ára að aldri

Slysið er sagt hafa átt sér stað á sunnudagsmorgun í suðvesturhluta Rio de Janeiro og um hafi verið að ræða árekstur tveggja þyrla. Sex hafi látist og var Tree þeirra á meðal. Variety greinir frá þessu og vísar í umfjöllun CNN Brazil. Tree birti síðast efni frá ferð sinni í Brasilíu á samfélagsmiðlum sínum í gær.

Tree vakti athygli árið 2016 þegar hann kom fram í vinsælu lagi bandaríska tónlistarmannsins Whethan. Hann náði svo flugi með stuttskífunni sinni Alien Boy sem hann gaf út árið 2018 og varð bæði áberandi í raftónlistarsenunni og í netheimum. 

Hann átti eftir að byggja upp stóran aðdáendahóp á samfélagsmiðlum og einkum á TikTok þar sem hann er með 15,4 milljónir fylgjenda. 

Tree var á tónleikaferðalagi um heiminn til að fylgja eftir fjórðu hljóðversplötunni sinni sem ber heitið Love You Madly, Hate You Badly. Túrinn hófst í Mexíkóborg þann 30. maí og átti hann meðal annars að koma við í Kína, Japan, á Suðurskautslandinu, Nýja-Sjálandi og í Suður-Afríku.