„Stærstu fréttir ferilsins“

Andrea er nýbyrjuð að segja frá lífi sínu á YouTube-síðu þar sem hún leyfir fylgjendum sínum að sjá bak við tjöldin þegar hún er að æfa og keppa. Hún fer yfir líf sitt sem langhlaupari, sýnir frá æfingum og öðru tengdu. Hún lýsir einnig persónulegri upplifun sinni af því erfiða og því skemmtilega í lífi langhlaupara.

Nýjasta YouTube-myndbandið byrjar á skemmtilegan hátt því hún gat sagt frá frábærum fréttum af sér. Andrea sagði ekki aðeins fréttirnar heldur sýndi einnig myndband af sér þegar hún var nýbúin að fá þær nokkrum dögum fyrr.

Brosti út að eyrum

„Það er fimmtudagur en ég verð að byrja á því að sýna ykkur hvað gerðist á mánudeginum,“ sagði Andrea og sýndi upptöku með sér. Það var mjög skemmtilegt að sjá gleði hennar og upplifun að sjá hana tjá sig þegar hún var nýbúin að skella á eftir þetta góða símtal.

„Ég bara varð að taka þetta bara strax upp í mómentinu. Ég var að klára mjög skemmtilegt símtal og þetta eru bara stærstu fréttir ferilsins,“ sagði Andrea og brosti út að eyrum.

„Ég var bara að samþykkja að skrifa undir alþjóðlegan atvinnumannasamning við Salamon [Íþróttavörumerkið] þótt ég eigi enn þá eftir að skrifa undir hann,“ sagði Andrea.

Það er ekki auðvelt fjárhagslega að helga sér íþrótt sína og það mátti sjá á íslensku hlaupakonunni hvað það var mikill léttir að fá smá slíkan samning sem auðveldar allt utanumhald í næstu framtíð.

Búinn að vera draumur svo lengi

„Þetta er búinn að vera draumur svo lengi. Ég fór náttúrulega í þessar búðir í janúar í Salomon-höfuðstöðvarnar í Annecy og var svo óðgeðslega vongóð eftir það um að eitthvað myndi gerast. Ég lenti svolítið á milli og fékk ekki alvöru samning heldur bara fatnað og ekki fjárstuðning eða neitt slíkt,“ sagði Andrea.

„Nú er það orðinn veruleikinn,“ sagði Andrea hreinlega syngjandi af gleði og bauð upp á dans að auki.

Hún skipti aftur í nútímann og fór aðeins betur yfir þetta.

„Ég hef aldrei verið jafn glöð með eitthvað og er ekki ennþá alveg að trúa þessu. Þannig að það eru allavega mjög spennandi tímar framundan,“ sagði Andrea og hélt síðan áfram með YouTube-þáttinn sinn.

Andrea glímir við meiðsli þessa dagana og tók þess vegna ekki þátt í Laugarvegshlaupinu sem hún hefur unnið oft. Hún ræðir æfingarnar og hvernig hún hlustaði ekki alveg nógu vel á sjúkraþjálfarann sinn og fór fram úr sér með því að gera of mikið of snemma.

Það má horfa á nýjasta þáttinn hennar hér fyrir neðan.