Akranesvöllur sundurgrafinn og hand­ó­nýtur

Til stóð að leikur ÍA og Keflavíkur í lokaumferð Bestu deildar karla færi fram á vellinum um helgina. Hann hefur verið færður inn í Akraneshöllina.

„Í fyrstu ætluðum við bara að taka holur utan við leikflötinn en síðan var það mikilvægt fyrir verkfræðistofuna að tekin yrðu líka sýni inni á vellinum til að fá betri niðurstöður um rúmmálið í jarðveginum undir vellinum. Á þessum tíma var völlurinn mjög blautur og þoldi illa að fá tæki inn á sig. Núna er hann óleikhæfur og þess vegna sóttum við um að spila inni í Akraneshöllinni,“ segir Ingimar Elí Hlynsson, framkvæmdastjóri ÍA, við íþróttadeild.

Eins og myndirnar með fréttinni sýna eru þetta engar smá holur á báðum vallarhelmingum. Þess utan má sjá stór hjólför í grasinu.

KSÍ skammaði ÍA fyrir að fara í þessar framkvæmdir án samráðs og það fór augljóslega fyrir brjóstið á sambandinu að ÍA teldi sig geta fengið undanþágu til að leika í Akraneshöllinni án samráðs.

„Rétt er að hér komi fram að mótanefnd KSÍ harmar þau vinnubrögð sem viðhöfð voru við þessa framkvæmd, sérstaklega samráðsleysi við KSÍ og að engin tilraun hafi verið gerð til að lagfæra skemmdir í vellinum og gera hann leikhæfan. Afleiðingin er sú að völlurinn er óleikhæfur. Nefndin telur sig ekki eiga annan kost en að samþykkja undanþágu um að leika í Akraneshöll. Sú ákvörðun er ekki einróma. Með von um að undirbúningur við fyrirhugaðar framkvæmdir gangi sem best og nýr leikvöllur verði að veruleika,“ segir í bréfi KSÍ sem fótbolti.net birti.

ÍA mun leggja gervigras á völlinn næsta vor og þarf að finna sér annan heimavöll á meðan framkvæmdir standa yfir næsta sumar.