Meira fyrir Manchester

Ricky Hatton ætlar að fullkomna góða viku fyrir Manchester-búa á laugardagskvöldið þegar hann mætir Juan Lazcano í hringnum á borgarleikvangnum í Manchester.

Hatton er harður stuðningsmaður Manchester City, en sér ástæðu til að gleyma ríg United og City á stundum sem þessari og hugsa um hag allrar borgarinnar.

"Við erum alltaf að skjóta hver á annan, stuðningsmenn City og United, en ég er að berjast fyrir alla borgina. Ég vil ekki styggja United-stuðningsmennina of mikið, því ég vil að þeir komi að horfa á mig á laugardaginn," sagði Hatton léttur í bragði.

"Reyndar verður mikið af knattspyrnumönnunum á ferðalagi með landsliðum sínum, en ég reikna samt með því að hálf enska úrvalsdeildin mæti og horfi á mig berjast," sagði Hatton og óskaði United-mönnum til hamingju með titilinn í gær.

"Leikurinn þróaðist eins og allt tímabilið. United var bara hálfu skrefi á undan og leikmennirnir sönnuðu það í gær."

Bardagi Hatton og Lazcano verður sýndur beint á Stöð 2 Sport klukkan 21 á laugardagskvöldið.