Læt mig hverfa ef ég tapa

Walesverjinn Joe Calzaghe segist hafa fulla trú á að hann geti sigrað Bandaríkjamanninn Bernard Hopkins í bardaga þeirra í Las Vegas þann 19. apríl næstkomandi.

Calzaghe er ósigraður á ferlinum og hefur verið einráður í yfir-millivigtinni í áratug. Hann fer upp um þyngdarflokk til að mæta "Böðulnum" Hopkins um aðra helgi og segir ekkert annað en sigur koma til greina.

Walesverjinn hafði áður lýst því yfir að þetta yrði næstsíðasti bardagi hans á glæstum ferli, en tap gegn Hopkins gæti breytt því.

"Ég mun hætta og læt ekki sjá mig meðal almennings ef ég tapa þessum bardaga. En Hopkins hefur aldrei barist við mann með hæfileika og höggkraft á við mig, svo ég efast um að ég tapi," sagði Calzaghe í samtali við Sun.

Bardagi þessa tveggja goðsagna verður sýndur beint á Stöð 2 Sport.