Óvíst hvort Pacquiao og Mayweather mætast

Óvíst er hvort að þeir Manny Pacquiao og Floyd Mayweather yngri mætist í hringnum þann 13. mars næstkomandi eins og áætlað var.

Samningaviðræður á milli aðila hafa átt sér stað síðustu mánuði og eru langt komnar. Hins vegar virðist sem svo að viðræður hafi nú siglt í strand þar sem Pacquiao neitaði að láta taka úr sér blóðprufu 30 dögum fyrir bardagann.

„Pacquiao vildi aðeins samþykkja að láta taka úr sér blóðprufu fyrir fyrsta sameiginlega blaðamannafundinn þeirra og svo eftir bardagann," sagði fulltrúi Mayweather.

„Þetta eru slæmar fréttir ekki síst í ljósi þess að aðilar voru búnir að komast að samkomulagi um öll önnur samningsatriði," bætti fulltrúinn við.

Pacquiao og Mayweather yngri eru almennt taldir bestu hnefaleikakappar heimsins í dag.