Reyna að græða á útför Ali

Muhammad Ali verður borinn til grafar í heimabæ sínum, Louisville í Kentucky, á morgun og komast færri á útförina en vildu koma.

Alls verður pláss fyrir 15 þúsund á útförinni og var miðum útdeilt frítt í gær. Þeir fóru á klukkutíma og fékk enginn fleiri en fjóra miða. Fólk stóð í röð yfir heila nótt í von um að fá miða.

Ekki ætla þó allir að nota miðann sinn í að mæta. Sumir reyna að græða á honum. Það var nefnilega byrjað að selja miða á netinu um leið og þeir voru búnir.

„Ég er hissa og finnst það í raun vera viðbjóðslegt að einhver ætli sér að reyna að græða á útför,“ segir Bob Gunnell, talsmaður Ali-fjölskyldunnar.