Önnur þyrlan í skoðun og hin ekki útkallshæf

Landhelgisgæslan gat aðeins sent eina þyrlu af þremur á vettvang slyssins við Hof í Öræfum í gær þar sem önnur var í viðhaldi og hin ekki orðin hæf til sjúkraflutnings- og björgunarútkalla. Framkvæmdastjóri aðgerðasviðs hjá Landhelgisgæslunni segir útreikninga sýna að nóg sé að Gæslan hafi hjá sér þrjár þyrlur.

Ein þyrla ekki nóg

Alls voru 32 farþegar auk bílstjóra í rútunni sem hafnaði utan vegar á Suðurlandsvegi við Hof í gær. Farþegarnir voru allir kínverskir ferðamenn og slösuðust fjórir þeirra alvarlega. Þeir voru fluttir á Landspítalann í Reykjavík með þyrlu Landhelgisgæslunnar en þrír þeirra eru enn á gjörgæslu.

Fréttastofa hafði eftir Rafal Figlarski, varðstjóra sjúkraflutninga á Selfossi sem var í hópi viðbragðsaðila í gær, að ein þyrla væri ekki nóg við slys á borð við það sem varð við Hof. Það hafi jafnframt ekki verið gott að heyra af svo takmörkuðu framboði af þyrlum í gær.

 

Almennt ekki hægt að reikna með nema tveimur þyrlum

Ásgrímur L. Ásgrímsson, framkvæmdastjóri aðgerðasviðs hjá Landhelgisgæslunni, segir Gæsluna hafa þrjár þyrlur til umráða en ein af þeim er ný þyrla frá Noregi. Annarrar nýrrar þyrlu er að vænta í júní.

Gert sé ráð fyrir að ein af þremur þyrlum Gæslunnar sé í skoðun eða langtímaviðhaldi á hverjum tíma. Almennt sé því ekki hægt að reikna með nema tveimur þyrlum í einu.

„Eins og oft hefur komið fram getum við lent í því að þótt það séu þrjár þyrlur, að ein er í langtímaskoðun, að það verður bilun í öðrum af þessum tveimur. Eins getum við lent í því að við eigum ekki nema eina áhöfn,“ segir Ásgrímur.

„Staðan í gær var sú að ein þyrlan er í langtímaskoðun. Ein af þessum nýju þyrlum sem við erum að taka við, hún er uppsett til þjálfunar á mannskapnum og er bara við það að detta inn í það að vera útkallshæf sem sjúkraflutnings- og björgunarþyrla. Það er að fara að gerast á næstu dögum eða vikum en í gær var hún ekki uppsett sem slík.“

Danirnir gerðu þyrluna klára á tveimur tímum

Þá bendir Ásgrímur á að aðrar ráðstafanir hafi verið gerðar. Sjúkraflugvél Mýflugs flaug með tíu slasaða frá Höfn á Selfoss, auk þess sem flaug TF-SIF, flugvél Landhelgisgæslunnar, flutti ellefu manns á Sjúkrahúsið á Akureyri. Þá var þyrla dansks varðskips, sem statt var í Reykjavíkurhöfn, einnig fengin til aðstoðar.

„Þeir voru með hana í viðhaldi og höfðu gefið okkur upp að þeir þyrftu sex tíma til að gera hana útkallshæfa, en við engu að síður höfðum samband við þá í gær og þeir gerðu hana klára á um tveimur tímum,“ segir Ásgrímur.

Ekki mikill ávinningur af fjórðu þyrlunni

Inntur eftir því hvort það sé nóg að hafa þrjár þyrlur til umráða segir Ásgrímur að útreikningar sýni að svo sé.

„Það hefur verið reiknað út sem jafna að miðað við kostnað og viðbragðsgetu þá komi það best út að hafa þrjár þyrlur. Auðvitað væri ákjósanlegast að hafa þá fjórðu en það eykur kostnaðinn mjög mikið og þá þarf líka um leið að tryggja það að það séu áhafnir til að fljúga þessu öllu saman,“ segir Ásgrímur.

„Það sem bætist við í getu við að hafa fjórðu þyrluna miðað við kostnaðinn, þá er ávinningurinn kannski ekki svo mikill.“

Ásgrímur vill ekki tjá sig um það hvort þörf sé á sjúkraþyrlu á Suðurland í ljósi fjölda umferðarslysa, og þar af margra mannskæðra, sem þar haf orðið síðustu ár. Almennt sé viðbótartækjabúnaður þó af hinu góða.

„Þeim mun meiri tækjabúnaður þeim mun betra, almennt,“ segir Ásgrímur.