„Núna kom í fyrsta skipti tímabil þar sem maður náði andanum“

Þórður hannaði tösku ásamt kærustu sinni, hönnuðinum Noreu Persdotter Wallström, en segir að það henti þeim ekki illa að vera í bæði ástarsambandi og vinnusambandi.

„Árið 2015 byrjaði ég í Myndlistarskólanum í Reykjarvík sem var algerlega ný upplifun á skólakerfinu. Þar á eftir fór ég í vöruhönnun. Meðfram skóla vann ég alltaf fyrir bróðir minn í JÖR búðinni sem hefur sennilega haft töluverð áhrif á mig,“ útskýrir Þórður.

„Ég ólst upp í mikilli listamannafjölskyldu í Gautaborg og byrjaði ég snemma að búa til alls kyns hluti. Árið 2008 byrjaði ég að læra textíl og fatahönnun. Þegar kom að því að velja Bachelor nám ákvað ég að ég vildi fara í Listaháskóla Íslands. Ég hafði eytt miklum tíma hér með sænsk-íslensku fjölskyldunni minni svo að valið var auðvelt,“ segir Norea.

Þrúgandi að binda sig við senu

Leiðir þeirra lágu fyrst saman í Listaháskólanum árið 2015 og búa þau nú saman í Berlín.

„Það er eins og við höfum þekkst í hundrað ár. Þrátt fyrir að við komum úr ólíkum áttum eigum við mjög margt sameiginlegt. Við erum frekar ólíkir karakterar en einhvern vegin smellum við mjög vel saman. Það eru kannski ekki allir sem gætu verið í vinnu sambandi og ástarsambandi en hingað til hefur það virkað mjög vel fyrir okkur.“

Þau segja að það séu margir kostir við að sameina kraftana og styrkleikana með þessum hætti, enda með bakgrunn í fatahönnun og vöruhönnun.

„Það getur verið mjög gott að sjá hlutina frá ólíkum sjónarhornum og ég held að bæði fög hafa mjög marga snertipunkta og það getur verið erfitt að greina á milli. Við þurfum í raun ekki að hafa áhyggjur af því í hvaða átt við förum næst því það getur oft verið þrúgandi að binda sig við einhverja eina senu."

Neyðin kennir nöktum 

Síðustu ár hafa Þórður og Norea verið mjög upptekin við að vinna fyrir annað fólk og sækja sér reynslu.

„Eftir útskrift fluttum við til Svíþjóðar þar sem Norea var að vinna fyrir fatamerkið Hope ásamt því að fara reglulega til Parísar til þess að vinna fyrir fatahönnuðinn Lutz Huelle sem hún hefur starfað fyrir síðustu fimm árin. Við fluttum svo til Berlínar árið 2019 því ég fékk vinnu í Stúdíói Ólafs Elíassonar en eftir eitt ár þar skall faraldurinn heldur betur á listaheiminn og því höfum við haft miklu meiri tíma saman. Þetta verkefni varð að miklu leyti til vegna faraldursins, í „lockdown“ ástandinu hér í Berlín. Við höfum alltaf hjálpað hvort öðru með vinnu hvors annars en aldrei beinlínis unnið saman. Sennilega vegna þess að við erum oftast að vinna fyrir annað fólk. En núna kom í fyrsta skipti tímabil þar sem maður náði andanum. Svo fara hugmyndir að kvikna þegar manni fer að leiðast og fyrst við þurfum að vera heima, þá ákváðum við að breyta heimilinu í stúdíó,“ segir Þórður.

„Við höfum alla tíð haft mjög gaman af því að fara í byggingavöruverslanir,“ segja þau um innblásturinn að töskunni. „Þar kvikna oft góðar hugmyndir en taskan varð síðan til einfaldlega vegna þess að Noreu vantaði tösku sem gæti haldið utan um alla smáhlutina hennar. Það er oft þannig að neyðin kennir nöktum að spinna. Við erum hrifinn af hlutum sem tekur langan tíma að búa til og eru handgerðir. Það sem gerir þessar töskur sérstakar er að engin taska er eins. Það þýðir líka að hönnunarferlinu líkur aldrei fyrir okkur og við erum alltaf á tánum.“

Hver taska er einstök og eru þær fáanlegar í takmörkuðu upplagi í Jör á Lækjartorgi 4. Þórður segir að hægt sé að hafa samband við þau og panta í gegnum Instagram. 

„Það var bara fínt hér fram á haust en nú taka við mjög strangar reglur og hálfgert útgöngubann fram á næsta ár. Það erfiðasta við búa hér núna er að geta ekki heimsótt fjölskyldur og vini okkar núna,“ segir Þórður um það hvernig það er að búa í Berlín í þessum heimsfaraldri.

„Við verðum bara við saumavélina eitthvað vel fram yfir hátíðirnar og svo tekur við mjög spennandi verkefni sem við munum segja frá síðar.“

Hægt er að fylgjast með Þórði og Noreu á Instagram síðunni Notar Studio.