Hugmyndir Simma fara illa í landsmenn

Í umræddri grein spurði Sigmar hvers vegna dagvinnufólk fengi lægri laun en þeir sem vinna um kvöld og helgar. Hann vill meina að fólki sé mismunað út frá hvaða tíma dags þeir vinna.

„Fjölskyldufólk er í miklum meirihluta launamanna sem eiga erfiðara með að vinna kvöld og helgarvinnu. Þeim er mismunað vegna þessa kerfis. Álagið leggst ofan á dagvinnutaxtann sem viðkomandi er með. Það þarf ekki stærðfræðing til að reikna út að starfsmenn í aukavinnu t.d. með námi þurfa færri tíma til að ná sömu launum og launamenn sem vinna 100% dagvinnu. Það er ekki jafnræði,“ skrifar Sigmar.

Jafna stöðu launamanna með grunntaxta

Hann stingur upp á því að fyrstu átta tímar á vakt, óháð klukkan hvað þeir séu unnir, væru alltaf á sama kaupi, svokölluðum grunntaxta.

„Með þessari hugmynd væri hægt að jafna stöðu launamanna innan sama fyrirtækis. Þessi leið myndi sporna gegn verðhækkunum á vörum og þjónustu fyrir viðskiptavini og gera Ísland samkeppnishæfara í ferðaþjónustu,“ skrifar Sigmar og vill meina að þessi hugmynd myndi breyta miklu fyrir lítil og meðalstór fyrirtæki á Íslandi.

„Það er alveg kominn tími til að lítil og meðalstór fyrirtæki fái sæti við kjarasamningsborðið og að kjarasamningar taki mið af raunheimum atvinnulífsins.“

Atvinnufjelagið sem Sigmar er í forsvari fyrir en nýstofnað félag sem vinnur að hagsmunum smærri og meðalstórra fyrirtækja. Samkvæmt vefsíðu þeirra er ætlunin að þétta raðirnar hjá launagreiðendum með skilvirkari hlutverkaskiptingu en nú er.

Kommentakerfið og Twitter ósátt

Í gærkvöldi birtist grein á DV með fyrirsögninni: „Simma finnst óréttlátt að fólk sem vinnur um kvöld og helgar fái meira borgað“ en Sigmari fannst fyrirsögnin ekki réttlát. Hann gagnrýndi hana á Instagram-síðu sinni í gær og sagði þetta vera „glatað take“ hjá miðlinum.

Í kommentakerfi miðilsins sagði hann að fyrirsögnin ætti frekar að vera: „Simma finnst óréttlátt að dagvinnulaun skulu ekki vera hærri“ og skammaði aðra meðlimi kommentanna fyrir að kynna sér ekki málið áður en það drullaði yfir aðra.

Hugmyndir Sigmars hafa ekki einungis náð til fólksins í kommentakerfinu heldur einnig til þeirra á Twitter. Þar hefur hann einnig verið gagnrýndur og kallaður öllum illum nöfnum.

Ekki til að atvinnurekendur græði

Sigmar svaraði fyrir greinina í Reykjavík síðdegis á Bylgjunni í gær og sagði hann hugmyndina ekki koma til svo hann sem atvinnurekandi geti grætt meiri pening.

„Það sem gerist er að í staðinn fyrir að við tölum um dagvinnutaxta, kvöldvinnutaxta og helgartaxta, þá tölum við bara um grunntaxta. Þá getum við hækkað grunntaxtann, þá getum við raunverulega loksins farið að hækka laun hjá þeim sem eru í hundrað prósent dagvinnu hjá okkur. Því það er mjög erfitt að hleypa því í launaskrið því það hækkar allt um 33 og 45 prósent um kvöldin og um helgar,“ segir Sigmar. Hann segir að þar sem hann sé atvinnurekandi að ræða þetta sé hann strax settur í dilk með að hann vilji maka krókinn meira.

„Ég er að fást við það að fá og halda fólki í dagvinnu og það horfir upp á það að vera betur sett með að fá bara kvöld- og helgarvaktir. Þá get ég sofið aðeins lengur, ég er kannski B-týpa. Það hentar ekki fjölskyldufólki. Fjölskyldufólk sem vill eiga eðlilegt fjölskyldulíf á erfitt með að vinna kvöld og helgar til þess að hífa upp launin sín,“ segir Sigmar.

Hugmyndin leiði til erfiðleika

Arnar Kjartansson, nýútskrifaður viðskiptafræðingur, birti svar við grein Sigmars á Vísi í morgun. Þar segir hann að hugmyndir Sigmars muni líklegast leiða til hærri starfsmannaveltu, uppsagna og erfiðleika með að manna vaktir.

„Vinsæll sjónvarpsmaður og atvinnurekandi í veitingageiranum sendi hér inn grein 1. júní þar sem að hann segist ekki skilja af hverju launþegar fá vaktaálag á kvöldin og um helgar. Þetta er ansi áhugavert þar sem hann rekur sjálfur fjöldann allan af veitingastöðum. Ég segi að þetta sé áhugavert þar sem að veitingageirinn er líklegast besta dæmi um af hverju launþegar fá þessi tilteknu launaálög. Það er vegna þess að lang mesta traffíkin inn á veitingastaði er einmitt á kvöldin og um helgar. Því er meira en eðlilegt að starfsmenn fái meiri laun fyrir meiri vinnu,“ skrifar Arnar.