„Ef það eru ekki mávar þá er það seðla­banka­stjóri“

Í­búar á höfuð­borgar­svæðinu hafa rætt aukinn á­gang máva á hverfis­hópum á sam­fé­lags­miðlinum Face­book. Meðal annars hafa í­búar rætt læti í mávum í vestur­bæ Reykja­víkur og þá hefur verið at­hugað með hreiður á toppi fjöl­býlis­húsa í Sjá­lands­hverfi í Garða­bæ vegna fjölda máva.

„Þetta er þessi ár­lega um­ræða,“ segir Jóhann Óli Hilmars­son, fugla­fræðingur, í sam­tali við Vísi. Mikil umræða átti sér stað um máva í mannabyggð í fyrra en Garðbæingar sögðust langþreyttir á ástandinu og veltu einhverjir því upp hvort mávar væru árasargjarnari en áður. 

 Jóhann Óli segir síst meira um máva í manna­byggð nú en síðustu ár. Upp úr 2005 hafi sílar­mávar í auknum mæli sótt í manna­byggð eftir að stofnar sand­sílis hrundu en á­standið svo aftur skánað rúmum tíu árum síðar.

„En þetta hefur alltaf verið reytingur af fuglum sem mætir í bæina. Sér­stak­lega á tímum sem þessum þegar ungarnir eru komnir, þá eru þeir meira á­berandi. Þeir eru vit­lausir, há­værir, frekir og ekki búnir að læra á lífið.“

Frekar dapurt á­stand hjá sjó­fuglum

Jóhann Óli ræddi á­stand sjó­fugla við frétta­stofu fyrir tveimur árum síðan. Þá hvatti hann til þess að þeir væru friðaðir og sagði á­stand þeirra dapurt, þeim hefði fækkað mikið vegna hlýnandi sjávar­hita.

„Þetta stefnir allt niður á við hjá mávum rétt eins og öðrum sjó­fuglum. Þetta er allt frekar dapurt. Það er þó mis­munandi eftir því hvaða tegund er um að ræða en sex tegundir verpa hér á landi. Svart­baknum hefur fækkað. Sílar­mávurinn virðist lafa og hettu­mávurinn er í sæmi­legu standi.“

Jóhann Óli segir nei­kvæðri um­ræðu um máva reglu­lega skjóta upp kollinum og þá sér­stak­lega á þessum tíma árs. Mávar fari í taugarnar á fólki.

„Við köllum þetta stundum tegundarasisma. Þetta eru meira og minna for­dómar. Þeir fara í taugarnar á fólki en þetta er í flestum til­vikum indælir fuglar. Það er einn og einn erfiður, að næla sér jafn­vel í unga og það fer enn meira í taugarnar á fólki.“

Ljóst sé að svöng dýr leiti sér að æti. Mávar geri þannig engan greinar­mun á steik á grilli, brauði við tjörnina sem eigi að fara til anda, eða annars mat.

„Þetta er ár­legur söngur. Við þurfum alltaf að hafa eitt­hvað til að kvarta yfir. Ef það eru ekki mávar þá er það seðla­banka­stjóri, eða þá tófan,“ segir Jóhann á léttum nótum.