Hútar vilja há­þróaðar stýri­flaugar frá Rússum

Hópurinn stjórnar Sanaa, höfuðborg Jemen, og stórum hlutum landsins í norðri og vestri. Átökin hafa leitt til hrikalegs mannúðarástands í Jemen, þar sem fátækt er mikil. Hungursneyð og smitsóttir hafa leikið í íbúa landsins grátt.

Frá því hernaður Ísraela á Gasaströndinni hófst hafa Hútar, sem njóta stuðnings frá Íran eins og Hamas og Hezbollah, gert ítrekaðar dróna- og eldflaugaárásir á fraktskip og herskip á Rauðahafi. Þeir hafa sökkt að minnsta kosti tveimur skipum og tekið eitt hervaldi.

Bretar og Bandaríkjamenn hafa gert fjölmargar árásir gegn Hútum og skotið niður fjölda eldflauga og dróna. Hútar hafa einnig skotið niður að minnsta kosti tvo bandaríska MQ-9 Reaper dróna með flugskeyti.

Sjá einnig: Segjast hafa skotið á flugmóðurskip eftir loftárásir

Sjö heimildarmenn Reuters fréttaveitunnar sem þekkja til viðræðnanna segja að ekki sé búið að taka ákvörðun í Kreml um hvort senda eigi Hútum eldflaugarnar sem þeir vilja.

Þar er um að ræða svokallaðar Yakhont eða P-800-eldflaugar, sem eru hljóðfráar stýriflaugar sem hannaðar eru til að sökkva skipum og eiga að geta drifið allt að þrjú hundruð kílómetra. Stýriflaugarnar voru fyrst þróaðar árið 1993 en þær fljúga á rúmlega tvöföldum hljóðhraða í um tíu til fimmtán metra hæð í átt að skotmörkum sínum og geta verið búnar allt að 250 kílógrömmum af sprengiefni.

Slíkar eldflaugar myndu gera Hútum kleift að gera mun skæðari árásir á fraktskip á Rauðahafi og ógna vestrænum herskipum sem hafa verið notuð til að verja skipasiglingar um hafsvæðið á undanförnum mánuðum.

Hér að neðan má sjá gamla frétt NBC News um tilraunir Rússa með eldflaugarnar.

Tengja stýriflaugarnar við kröfu Úkraínumanna

Reuters hefur eftir heimildarmönnum sínum að Ebrahim Raisi, fyrrverandi forseti Írans, sem lést í þyrluslysi í maí, hafi byrjað á því að hafa milligöngu milli Rússa og Húta. Þá segir miðillinn að rússneskir erindrekar hafi tvisvar sinnum fundað með sendinefnd Húta í Tehran í Íran á þessu ári.

Þar eru þeir sagðir hafa rætt hvort Rússar væru tilbúnir til að senda Hútum áðurnefndar stýriflaugar í tugatali.

Til að koma slíkum vopnum í hendur Húta, þyrfti það að gerast án þess að Bandaríkjamenn og aðrir kæmust að því og Rússar þyrftu einnig að þjálfa Húta í notkun stýriflauganna. Ferlið væri nokkuð umfangsmikið.

Rússar hafa þó áður sent Yakhont-stýriflaugar til Hezbollah í Líbanon.

Bandaríkjamenn eru sagðir hafa áhyggjur af því að veiti þeir Úkraínumönnum leyfi til að nota bandarísk vopn til árása í Rússlandi, muni ráðamenn í Kreml ákveða að senda Hútum stýriflaugar. Háttsettur bandarískur embættismaður sagði Reuters að vísbendingar væru um að viðræður Rússa og Húta tengdust að einhverju leyti kröfum Úkraínumanna um áðurnefnd leyfi.

Vladimír Pútín, forseti Rússlands, sagði til að mynda í júní að Rússar gætu sent langdræg vopn til andstæðinga Bandaríkjanna og annarra víðsvegar um heim.

Öryggissérfræðingar segja í höndum Húta myndu stýriflaugarnar gerbreyta öryggisástandinu í Mið-Austurlöndum. Hútar gætu ekki eingöngu notað þær gegn breskum og bandarískum herskipum, eða fraktskipum, heldur einnig gegn skotmörkum í Sádi-Arabíu.

Sádar eru sagðir hafa komið áhyggjum sínum á framfæri við yfirvöld í Rússlandi.