Veg­farandinn er látinn

Vegfarandinn var fluttur á slysadeild í nótt en slökkviliðið á höfuðborgarsvæðinu sagði í samtali við Vísi í morgun að ökumaðurinn hafi verið óslasaður. 

„Banaslys varð á Sæbraut í Reykjavík í nótt, en þar var fólksbifreið ekið norður Sæbraut, á milli Súðarvogs og Kleppsmýrarvegar, og á gangandi vegfaranda sem var á leið yfir götuna til austurs,“ segir í tilkynningunni. Lögreglan á höfuðborgarsvæðinu og rannsóknarnefnd samgönguslysa rannsaka nú tildrög slyssins

Um er að ræða þrettánda banaslysið í umferðinni það sem af er ári. Átta létust í umferðarslysi á síðasta ári en níu árið 2022 og árið 2021. Ekki hafa látist fleiri í umferðinni síðan árið 2018 en þá létust átján manns.

Töluvert viðbragð var á svæðinu en lögreglan á höfuðborgarsvæðinu kvartaði yfir því í dagbók sinni að hluti vegfaranda hafi ekki sýnt störfum lögreglu nægilega tillitssemi.

„Tilkynnt um alvarlegt umferðarslys á Sæbraut við Vogabyggð. Meðan lögreglumenn voru við störf á vettvangi bar að nokkurn fjölda vegfaranda og er það samdóma álit lögreglumanna að hluti vegfaranda hafi sýnt störfum lögreglu lítinn skilning og verið ósáttir við að komast ekki leiðar sinnar.

Lögregla minnir á að ávallt er góð ástæða fyrir lokunum lögreglu, en þær eru bæði til að tryggja vettvanginn í tengslum við rannsóknarhagsmuni auk þess að tryggja öryggi viðbragðsaðila sem starfa innan lokana,“ segir í dagbók lögreglu.