Ráða­menn ríkis og borgar hallast að því að halda á­fram með Hvasshraun

Í fréttum Stöðvar 2 voru sýndar ýmsar útfærslur sem teiknaðar hafa verið upp í gegnum tíðina af flugvelli í Hvassahrauni, allt frá innanlandsflugvelli upp í stóran millilandaflugvöll.

Fjölmörg mælingaflug yfir svæðið, í mismikilli ókyrrð, á vegum Háskólans í Reykjavík undir stjórn Gylfa Árnasonar vélaverkfræðings eru helsti þáttur veðurfarsrannsókna. Sérfræðingar Veðurstofu Íslands unnu hættumat gagnvart náttúruvá.

Innviðaráðherra kynnti í dag þær meginniðurstöður að veðurfarslega væri svæðið svipað Reykjavíkurflugvelli og að líkur á hraunrennsli teldust afar litlar.

Hér má sjá frétt Stöðvar 2:

Vilji stjórnvöld á annað borð halda áfram með málið leggur starfshópurinn, undir forystu Eyjólfs Árna Rafnssonar, til að í Hvassahrauni verði tekið frá svæði, sem annaðhvort nægi innanlandsvelli, 3x3 kílómetrar að flatarmáli, eða stærra svæði, 5x5 kílómetrar að flatarmáli, sem geti rúmað allt að tvær þrjúþúsund metra langar brautir og eina fimmtánhundruð metra langa. Völlurinn geti þannig einnig þjónað sem varaflugvöllur millilandaflugs.

En nú er það stóra spurningin: Hvað ætla ráðamenn ríkis og borgar að gera í framhaldinu? Ætla þeir að verja meiri fjármunum skattborgara í að rannsaka flugvallarstæði í Hvassahrauni?

„Þessi tæknilega skýrsla gefur okkur tilefni til að þess að segja: Höldum áfram mælingum. Höldum áfram rannsóknum,“ segir Svandís Svavarsdóttir innviðaráðherra.

„Ef við ætlum að halda þeim möguleika opnum að þetta gæti orðið niðurstaða inni í framtíðinni þá þurfum við að halda áfram að vega og meta og mæla. Það er svona það sem skýrsluhöfundar benda á að það sé að minnsta kosti ekki ástæða til þess að þessi kostur fari út af borðinu,“ segir Svandís.

„Þá er bara að halda áfram með málið. Vinna fjárhagsrýni á hugsanlegum flugvelli þarna og gera áhættumat fyrir svæðið og áhættumat á fjárfestingunni. Það er mikilvægt bara að halda áfram vinnunni,“ segir Einar Þorsteinsson borgarstjóri.

„En að því sögðu þá hefur engin ákvörðun verið tekin um fjárfestinguna sjálfa.“

-En engu að síður: Frekari undirbúningur kostar meiri fjármuni. Er borgin tilbúin að leggja meiri fjármuni í Hvasshraunsflugvöll?

„Ja… ég held að það sé eðlilegt að halda áfram þessari vinnu. Það eru ekki stórir fjármunir í svona stóra samhenginu,“ svarar Einar.

En sennilega eru stærstu tíðindi skýrslunnar þau að hætta af hraunrennsli er talin afar lítil. Hún er þó ekki útilokuð.

„Það er áhætta. Það verður aldrei hægt að útloka hana. Líkurnar eru ekki miklar en þær eru fyrir hendi,“ segir Eyjólfur Árni Rafnsson, formaður starfshóps um Hvassahraunsflugvöll.

Það þyrfti þó frekar stórt eldgos, að mati skýrsluhöfunda, tvöfalt stærra en það stærsta sem landsmenn hafa upplifað í Sundhnúksgígaröðinni á þessu ári.

„Ef það kæmi slíkt gos upp á Krýsuvíkursvæðinu, norðarlega í því eldstöðvakerfi, þá eru líkur til að það hraunrennsli myndi ná inn á stærra svæðið.

En að það myndi ná inn á minna svæðið, sem við skilgreindum þarna á myndinni, líkurnar eru sáralitlar á því. En ekki hægt að útiloka neitt,“ segir Eyjólfur Árni.