Segir að Fury muni ekki snúa aftur

Í byrjun þessa árs tilkynnti Fury að hann hefði lagt hanskana á hilluna. Margir tóku þeirri tilkynningu með fyrirvara enda hefur Fury áður hætt en snúið aftur. Hann hefur alls fimm sinnum sagst vera hættur. En Arum telur að nú séu hanskarnir komnir á hilluna fyrir fullt og allt.

„Ef ég væri gefinn fyrir veðmál myndi ég segja að hann myndi aldrei berjast aftur,“ sagði Arum við BBC.

„Marvin Hagler sagði stundum: Ríkur maður sem gengur til náða í silkináttfötum fer ekki á fætur á morgnana til að fara í vegavinnu. Ég held að Tyson vilji ekki rífa sig á lappir og fara í vegavinnuna og fara í gegnum æfingar þegar hann þarf þess ekki fjárhagslega.“

Fury tapaði síðustu tveimur bardögum sínum á ferlinum fyrir Oleksandr Usyk. Hann vann alls 34 af 37 bardögum sínum á ferlinum og einn endaði með jafntefli.