Telur að með­leigjandinn hafi kveikt í

„Þann 22. maí kviknaði í íbúð minni og ég tel líklegt að meðleigjandi minn til margra ára hafi kveikt í henni með bensíni og gashylkjum. Ég og annar meðleigjandi vorum sofandi á meðan. Þegar ég vaknaði var eldurinn þegar kominn að herberginu mínu og það var svo heitt og rakt að ég trúði þessu varla,“ segir Sári í færslu á samfélagsmiðlum sem hann birti í dag.

Stökk út um glugga

Sári segir frá því að hann hafi reynt að hjálpa vini sínum að komast úr íbúðinni en hlotið mikla brunaáverka í kjölfarið. Síðan hafi hann þurft að komast úr íbúðinni og átt þann eina kost að brjóta rúðu í glugga og klifra þar út.

„Ég braut rúðuna með hnefanum og stökk svo út, og féll svo 70 sentímetra niður til jörðu beint á öll stóru glerbrotin. Ég fékk tvo risastóra skurði, einn á lærið og annan á úlnliðinn. Ég hljóp svo að hurðinni og reyndi aftur að hjálpa vini mínum Roman úr íbúðinni en allt kom fyrir ekki,“ segir hann.

Átti að flytja út daginn eftir

Sári telur að einn meðleigjandi hans, sem átti að flytja úr íbúðinni daginn eftir vegna vangoldinnar leigu, hafi kveikt í íbúðinni. Hann lést í eldsvoðanum.

RÚV greinir frá því að fjórir karlmenn hafi búið í íbúðinni. Sári og Görbe Vince frá Ungverjalandi, Roman frá Tékklandi og sá fjórði Bandaríkjamaður.

Roman og Bandaríkjamaðurinn létust í brunanum.

Sári segir frá því að vinur hans og meðleigjandi Görbe Vince hafi verið í vinnunni þegar eldsvoðinn varð og hann hafi því sloppið.

Hann sé hins vegar allslaus í dag og án heimilis.

Sári segir að hann sé með annars stigs bruna á allri vinstri hlið líkamans, og með marga skurði. Hann hafi þegar undirgengist tvær aðgerðir og þurfi mögulega að fara í tvær til viðbótar.