Skjálfti upp á þrjá í Kötlu

Í dag kl. 09.15 mældist skjálfti af stærð 3 í Mýrdalsjökli á Suðurlandi samkvæmt gögnum frá veðurstofunni.

Steinunn Helgadóttir, náttúruvársérfræðingur á Veðurstofu Íslands, segir í samtali við Vísi að seinast hafi mælst skjálfti af þessari stærð í nóvember. Í þessu tilfelli hafi engir eftirskjáftar fylgt.  Fátt bendir því til þess að gos sé að hefjast en seinast gaus í Kötlu árið 1918.

Hún segir að veðurstofan skoði nú hvort jarðhitaleki hafi orðið á svæðinu enda um virkt jarðhitasvæði að ræða. 

„Þannig að við erum að fylgjast með rafleiðinimælingum,“ segir Steinunn.