Innlent

Berg­þórs­hvoll brenndur á fjögurra daga Njáluhátíð

Kristján Már Unnarsson skrifar
Guðni Ágústsson, formaður Njálufélagsins, rekur sjálfum sér kinnhest í viðtali í Laugarnesi í Reykjavík, einum sögustaða Njálu.
Guðni Ágústsson, formaður Njálufélagsins, rekur sjálfum sér kinnhest í viðtali í Laugarnesi í Reykjavík, einum sögustaða Njálu. Bjarni Einarsson

Njálsbrenna verður sviðsett og Bergþórshvoll brenndur með hópreið 99 brennumanna á fjögurra daga Njáluhátíð sem nýstofnað Njálufélag undir forystu Guðna Ágústssonar, fyrrverandi ráðherra, efnir til í Rangárþingi í næsta mánuði. Guðni segir þetta verða tignarlegustu sjón allra tíma.

Njálssaga er þekktasta Íslendingasagan en í Rangárþingi eru helstu sögustaðirnir, Hlíðarendi og Bergþórshvoll, þar sem aðalsöguhetjurnar bjuggu, og þar var Njálsbrenna. Og það er ekki tilviljun að í fréttum Sýnar hittum við Guðna í Laugarnesi í Reykjavík en þar er Hallgerður langbrók sögð grafin.

„Þessi staður kemur fyrst við sögu í Njálu. Héðan var Glúmur, maðurinn sem Hallgerður elskaði, annar maðurinn,“ segir formaður Njálufélagsins.

Frá Bergþórshvoli. Þar var Njálsbrenna, stærsti atburður Njálssögu.Stöð 2

Undir kjörorðunum „Upp með Njálu“ fer Guðni núna fyrir fjögurra daga Njáluhátíð dagana 21. til 24. ágúst næstkomandi.

„Þetta verður mögnuð uppákoma. Þetta verður leiklist, þetta verður söngur, þetta verða sögur. Og við setjum loksins á svið þennan harmi þrungna atburð þegar Njáll og synir hans voru brenndir inni. Og Kári slapp út.“

Dagskráin hefst fimmtudagskvöldið 21. ágúst í íþróttahúsinu á Hvolsvelli. Þar verður sungið ljóð Hannesar Hafstein, Skarphéðinn í brennunni, hljómsveitin Hundur í óskilum flytur nýtt efni úr Njálu, auk þess sem Guðni segir landsliðið í leiklist leika valda kafla úr Njálu, þar á meðal kinnhestinn. Síðan stigi hetjur á svið.

Horft úr Fljótshlíð í átt að Rauðuskriðu, eins og Stóri-Dímon heitir í Njálssögu. Þessa leið gæti Gunnar á Hlíðarenda hafa riðið á leið í útlegð þegar hann leit til baka og sagði „fögur er hlíðin“ og sneri við.Stöð 2

Stóri dagurinn er laugardagurinn 23. ágúst og hann verður á svæði hestamanna á bökkum Rangár við Hellu, að sögn Guðna.

„Þar höfum við reist bæinn Bergþórshvol eins og hann var árið 1011.“

Þangað koma 99 skikkjuklæddir hestamenn sem riðið hafa um langan veg í fótspor brennumanna Bergþórshvols og endurtaka með táknrænum hætti eftirminnilegustu brennu Íslandssögunnar á laugardagskvöldinu.

„Þá kemur Flosi inn á völlinn með 99 brennumenn, ríður einn hring, grípur logandi blys, gengur að arfasátunni og kveikir eld. Og bærinn brennur,“ segir Guðni hér í frétt Sýnar:

Brekkusöngur verður fram á nótt en á sunnudeginum verður messa í Oddakirkju helguð Snorra Sturlusyni.

„Við bjóðum Íslendingum að vera viðstaddir. Þetta er hátíð sem kostar ekkert inn á.

Ég trúi því að menn muni mæta og vilja upplifa þennan mikla atburð sem loksins er sviðsettur og verður kvikmyndaefni.

Þú getur ímyndað þér - þegar þú sérð 99 brennumenn, skikkjuklædda í skrautreið með tvo hesta hver - ríða inn á völlinn. Þetta verður tignarlegasta sjón allra tíma.“

Hér má sjá ítarlegra viðtal við Guðna um verkefnið:

Rangárþing eystra Rangárþing ytra Bókmenntir Hestar Þingvellir Menning Tónlist Leikhús Ferðaþjónusta

Tengdar fréttir

Gamlir Fóstbræður sungu fyrir Njál og hans fólk á Bergþórshvoli

Það var líf og fjör á Bergþórshvoli í Vestur Landeyjum á slóðum Brennu Njálssögu þegar hópur karla, sem eru í Gömlu Fóstbræðrum mættu á staðinn til að syngja fyrir Njál og hans fólk á bænum. Fóstbræður er elsti karlakór landsins stofnaður 1916.

Njálssaga myndskreytt með 150 teikningum

Segja má að Brennu – Njálssaga hafi öðlast nýtt líf og „lifnað“ við með hundrað og fimmtíu teikningum af vettvangi atburða í sögunni. Myndirnar verða notaðar á skólavef aðallega ætluðum framhaldsskólum með styttri texta og útskýringum á tölvutæku formi og auðlesnari máli en í frumritinu

Sturla skrifaði Njálu - það er nánast óhrekjandi

Leitinni að höfundi Njálu er lokið að sögn Einars Kárasonar rithöfundar. Hann segir nánast hafið yfir vafa að Sturla Þórðarson, aðalpersónan í Skáldi, lokabindi þrílógíu hans um Sturlungaöld, hafi varið síðustu æviárunum í skriftir á þessari frægustu bók Íslandssögunnar.

Mest lesið


Fleiri fréttir

Sjá meira


×

Mest lesið