Ung hnefaleikakona í dái eftir rot­högg

Hin nítján ára gamla Sio keppti við Jocelyn Camarillo í fyrsta bardaga kvöldsins á ProBoxTV-viðburðinum í National Orange Show Event Center þegar hún missti meðvitund eftir röð höfuðhögga.

Sio fékk læknisaðstoð strax eftir að bardaganum lauk og sást fá krampa þegar hún var borin á sjúkrabörum út úr salnum. Hún var flutt á Loma Linda University Health-sjúkrahúsið til frekari meðferðar.

„Fyrir hönd forstjórans Garry Jonas og allrar ProBox-fjölskyldunnar biðjum við fyrir skjótum bata Isis Sio,“ birti ProBoxTV á samfélagsmiðlareikningi sínum á sunnudag. „Fröken Sio er nú í dái. Hugur okkar er hjá henni og fjölskyldu hennar á þessum erfiðu tímum.“

Sio tapaði með rothöggi í annað sinn í röð. Hún var stöðvuð með höggum í búkinn í janúar og var sett í bardaga gegn Camarillo (6 sigrar í 6 bardögum), sem hafði aldrei náð rothöggi en stöðvaði Sio eftir rúmlega mínútu í bardaganum á laugardag. 

Sio gerðist atvinnumaður í september 2025 og hefur unnið einn bardaga en tapað þremur á stuttum ferli sínum.