Stóra boxkvöldinu í Gamla bíói slegið á frest

Kolbeinn Kristinsson átti loksins að fá að stíga á svið á heimavelli, þrátt fyrir að margra mati úrelt bann við atvinnumannahnefaleikum hér á landi, þann 10. apríl. Þar átti hann að mæta Austurríkismanninum Sasa Milenkovic í tólf lotu aðalbardaga kvöldsins.

Viðburðinum hefur hins vegar verið frestað og er það vegna hnémeiðsla Kolbeins. Þetta kemur fram í tilkynningu frá Nordic Ring Promotions sem stendur á bakvið viðburðinn.

„Þótt þetta séu vonbrigði fyrir alla sem að málinu koma er það forgangsatriði að Kolbeinn fái svigrúm til að ná sér að fullu og snúa heill aftur í hringinn,“ segir í tilkynningunni.

Þar kemur jafnframt fram að fljótlega komi upplýsingar um nýja dagsetningu og ljóst að menn eru ekki af baki dottnir.

Var fullur sjálfstrausts og staðráðinn í að ná rothöggi

Auk Kolbeins áttu fleiri atvinnumenn okkar Íslendinga að berjast á kvöldinu. Þeirra á meðal eru Valgerður Guðsteinsdóttir og Emin Kadri sem nú munu líkt og aðrir þurfa að bíða eitthvað lengur eftir stóru stundinni.

Fyrir mánuði síðan var Kolbeinn í viðtali við Vísi og kvaðst þá í toppformi og tilbúinn að sýna sínar bestu hliðar á heimavelli. 

„Maður er bara fullur sjálfstrausts. Ég er búinn að sjá það fyrir mér að ég sé að fara rota hann hérna fyrir framan alla og húsið tryllist. Ég er búinn að sjá það fyrir mér þúsund sinnum.

Maður er búinn að fara um allan heiminn, verða betri í sínu fagi. Svo kemur maður heim og sýnir öllum hversu góður maður er orðinn. Þetta er smá útskriftarveisla,“ sagði Kolbeinn í síðasta mánuði, áður en ljóst varð að fresta þyrfti veislunni vegna hnémeiðslanna.