Bruninn mikið á­fall og tjónið lík­lega veru­legt í versluninni

„Ég vaknaði við viðvörunarkerfið í Andrá, ég hélt ég hefði stillt einhverja fáránlega vekjaraklukku. Svo var hringt frá Securitas og þá var reykskynjarinn kominn í gang,“ segir Steinunn Hrólfsdóttir, einn eigenda verslunarinnar Andrá við Laugaveg 16.

Stuttu síðar hafi hún svo fengið staðfest að Slökkvilið höfuðborgarsvæðisins hafi verið komið á vettvang.

Eldur kviknaði í nótt á hóteli í sama húsi. Tveir gesta hótelsins voru fluttir á slysadeild vegna gruns um reykeitrun og einn handtekinn vegna málsins.

Steinunn segist hafa drifið sig niður eftir en þær ekkert fengið að fara strax inn.

„Það var hræðilegt að koma að, það voru gestir á hótelinu og maður vissi ekki neitt. En við fengum fljótt upplýsingar um að það væru flestir komnir út.“

Reykur en ekki eldur

Steinunn og Eva Katrín Baldursdóttir eigendur voru í versluninni í alla nótt.

„Það var svo mikill reykur bak við, þar sem lagerinn okkar, þannig við vorum að reyna að bjarga því sem hægt var,“ segir hún og að þær hafi svo, þegar þær máttu fara inn, reynt að færa til það sem hægt var.

Þær segja að sem betur fer hafi ekki verið eldur í versluninni en reykurinn hafi verið töluverður.

Eva Katrín segir þær bíða eftir svörum frá tryggingarfélagi um hvað þær eigi að gera næst.

„En þetta er mikið sjokk,“ segir Eva Katrín.

Steinunn segir almennt hafa verið rólegt í nótt. Það hafi verið mikið af fólki í bænum og margir að fylgjast með. Það hafi samt fækkað fljótt í hópnum eftir því sem leið á nóttina.

„Við fengum ekki að fara strax inn, það var opnað og reykræst. Mesti reykurinn var í kjallaranum þannig að það þurfti að lofta út,“ segja þær en að staðan sé töluvert betri núna.

Lyk í fötunum

Spurðar um tjónið segir Steinunn að þær hafi verið að „moka inn“ haustvörum síðustu daga og því verði tjónið eitthvað.

„Mikið af fallegum hlutum, mjög leiðinlegt,“ segir Steinunn og að það þurfi að meta tjónið. Þetta sé í raun versti tíminn því það sé svo mikið af nýjum klæðnaði í versluninni.

Það sé lykt í fötunum sem hangi í búðinni en eitthvað sé í kössum og plasti og þær eigi eftir að meta það.

Þær vita ekki hvað tekur við næst en segjast vera að leita að húsnæði til að taka vörurnar í.

„Ef einhver vill lána okkur húsnæði þannig að við getum farið með lagerinn þangað og reynt að koma búðinni í stand,“ segir Steinunn.

Eva Katrín tekur undir það og að þær vilji endilega heyra í fólki sem hafi lent í slíkum bruna. Þær eigi samt sem áður von á því að tryggingafélagið ráðleggi þeim með næstu skref.