AC Milan komst í þriðja sætið

AC Milan komst í kvöld upp í þriðja sæti ítölsku úrvalsdeildarinnar. Liðið lagði þá Lazio, 3-0, og hafði um leið sætaskipti við liðið frá Róm.

Leikurinn byrjaði ekki gæfulega fyrir Lazio því Andrea Candreva var rekinn af velli strax eftir fimmtán mínútna leik.

Leikmenn Milan nýttu sér heldur betur liðsmuninn því þeir skoruðu tvö mörk fyrir hlé.

Fyrst skoraði Giampolo Pazzini og svo Kevin Prince Boateng. Pazzini skoraði sitt annað mark er hálftími lifði leiks.