Umboðsmenn eru sníkjudýr og þarf að ná mömmunni á völlinn

VÍB hélt áhugaverðan fund í morgun um fjármál í fótbolta. Þar flutti Nils Skutle erindi en hann var formaður norska liðsins Rosenborg á blómaskeiði félagsins frá 1998 til 2011.

Er erindi Skutle lauk voru pallborðsumræður með Skutle og Jóni Rúnari Halldórssyni, formanni knattspyrnudeildar FH, og Baldri Stefánssyni, varaformanni knattspyrnudeildar KR.

Farið var um víðan völl og mikið rætt um hvað myndi gerast ef íslenskt félag kæmist inn í riðlakeppni Evrópudeildarinnar en þeim árangri myndi fylgja miklar tekjur. Meðal annars var því vel velt upp hvar íslensku liðin myndu spila.

„Við myndum ekki spila á Íslandi. Það yrði ekki hægt. Við yrðum að spila í Noregi eða Danmörku," sagði Jón Rúnar.

Skutle fór ekki fögrum orðum um umboðsmenn í pallborðsumræðunum.

„Umboðsmenn eru óþolandi," eða „pain in the ass" eins og Skutle orðaði það. „Þeir koma brosandi og taka svo mikinn pening af félögunum. Það verður að losna við þá úr knattspyrnuheiminum. Það er erfitt enda er venjulega mjög erfitt að losna við sníkjudýr," sagði Skutle ákveðinn en Íslendingarnir voru honum sammála um að umboðsmenn væru vandamál í fótboltaheiminum.

„Við verðum að halda mönnum lengur á Íslandi. Láta þá spila 3-4 ár í Pepsi-deildinni. Þá getum við selt almennilega vöru. Við erum að gefa 16 og 17 ára stráka til útlanda. Svo erum við gagnrýndir fyrir að gefa ekki ungum leikmönnum tækifæri? Hverjum eigum við að gefa tækifæri?" sagði Jón Rúnar og Skutle tók undir að það væri mikilvægt fyrir íslensku liðin að halda sínum efnilegustu strákum lengur á landinu.

„Leikmenn vilja meiri sveigjanleika í samningum til þess að komast út. Það er mjög erfitt fyrir félögin sem verða að selja einn til tvo leikmenn á ári til þess að geta staðið undir rekstrinum," sagði Baldur.

Svo var einnig talað um hvernig mætti fjölga áhorfendum á íslenskum völlum. Skutle kom með ráðleggingar.

„Það þarf að fá fjölskyldurnar á völlinn. Til þess að ná fjölskyldunni þá þarf að fá mömmuna með. Hún er drottningin sem ræður. Það má líka ekki vera of dýrt að fara á völlinn," sagði Skutle en hann hrósaði íslensku liðunum sem væru á réttri leið.

„Menn ná aldrei árangri ef þeir eiga sér ekki draum."

Hér að neðan má sjá upptöku frá fundinum.