Viðar Ari gæti spilað með Fram í sumar

Þetta kemur fram á knattspyrnuvefnum Fótbolti.net. Þar segir að „háværar sögusagnir“ séu í gangi um að hinn 29 ára gamli Viðar Ari gæti leikið með Fram í sumar, þó ekki væri nema þangað til hann finni sér nýtt lið.

„Hann er búinn að vera að halda sér í formi og ég held að hann sé með eitthvað á borðinu erlendis frá,“ sagði Agnar Þór Hilmarsson, formaður knattspyrnudeildar Fram, í viðtali við Fótbolti.net.

Í frétt miðilsins segir jafnframt að velunnari félagsins, vinur Viðars Ara, sé tilbúinn að borga laun hans fari svo að hann semji við Fram. Agnar Þór gat nú ekki tekið undir það: „Mátt finna þennan vin og biðja hann um að hringja í mig,“ sagði hann hlæjandi.

Viðar Ari á að baki 7 A-landsleiki. Hann er uppalinn í Þrótti Reykjavík en fór ungur að árum til Fjölnis í Grafarvogi. Þaðan fór hann til Brann í Noregi, kom til FH á láni 2018 áður en hann samdi við Sandefjord. Þar var hann allt til 2021 þegar hann færði sig yfir til Ungverjalands. Hvert leiðin liggur næst er óvíst en það gæti farið svo að hann færi sig upp í Grafarholt.

Fram er í 10. sæti Bestu deildar karla með 14 stig að loknum 15 leikjum, einu stigi fyrir ofan fallsæti.