Umfjöllun og viðtöl: ÍBV - Kefla­vík 1-1 | Eyja­menn fylgdu Kefl­víkingum niður um deild

ÍBV er fallið niður í Lengjudeildina eftir 1-1 jafntefli gegn Keflavík í lokaumferð Bestu deildarinnar í dag. Bæði lið lið munu leika í næst efstu deild á næsta tímabili.

ÍBV eygði von um að halda sæti sínu í deildinni en þurftu þá á sigri að halda í leiknum og treysta á hagstæð úrslit úr öðrum leikjum þar að auki.

Eyjamenn byrjuðu af nokkrum krafti og ætluðu sér greinilega að reyna að ná inn marki snemma til að setja pressu á liðin í kringum þá í töflunni.

Arnar Breki Gunnarsson fékk mjög gott færi á 8. mínútu sem hann nýtti ekki og þá fengu heimamenn möguleika til að búa til færi sem þeir hefðu getað farið betur með. Keflvíkingar ógnuðu líka en lengst af var dauft yfir fyrri hálfleiknum og þá sérstaklega liði heimamanna.

Staðan í hálfleik markalaus og Hermann Hreiðarsson greip til aðgerða og gerði tvær breytingar á liði ÍBV í hálfleik. Það var ekki að sjá á Eyjaliðinu að mikið væri undir og vantaði alla ákefð hjá heimamönnum.

Í upphafi síðari hálfleiks kom síðan fyrsta markið. Það skoraði Muhames Alghoul fyrir Keflavík eftir mistök í vörn Eyjamanna og góð sendingu frá Sami Kamel. Stuttu síðar fékk Edon Osmani algjört dauðafæri þegar hann slapp einn gegn Guy Smit. Skotið hins vegar beint á Smit.

Oliver Heiðarsson kom inn af bekknum á 60. Mínútu og færi smá líf í lið Eyjamanna. Hann fiskaði víti á 69. Mínútu eftir frábæra sendingu frá Alex Frey Hilmarssyni. Eiður Aron Sigurbjörsson skoraði af öryggi úr vítinu og jafnaði metin.

Eyjaliðið sótti mikið eftir það. Alex Freyr Hilmarsson fékk tvö góð færi til að skora undir lokin en tókst ekki að skora, að einhverju leyti saga Eyjaliðsins í sumar. Mark hefði þó litlu breytt því Fylkismenn voru með örugga forystu í sínum leik en Eyjamenn þurftu að treysta á tap þeirra ef eins marks sigur hefði átt að duga.

Lokatölur í Eyjum 1-1 og Eyjamenn fylgja því Keflvíkingum niður í Lengjudeildina og leika þar að ári.

Af hverju varð jafntefli

Keflvíkingar voru betra liðið í fyrri hálfleik en ÍBV í þeim síðari. Eyjamenn fengu fleiri færi í seinni hálfleiknum til að skora og vinna sigur í leiknum en nýttu þau ekki. Færanýtingin er ein af ástæðunum fyrir því að ÍBV fellur nú í Lengjudeildina.

Þessir stóðu upp úr:

Oliver Heiðarsson átti fína innkomu hjá ÍBV og ógnaði með hraða sínum. Hjá Keflavík átti Gunnlaugur Fannar fínan leik sem og Magnús Þór sem var lengst af við hlið hans í vörninni.

Hvað gekk illa?

Eyjamenn voru daufir lengi vel í leiknum og sérstaklega í fyrri hálfleik. Eftir ágæta byrjun datt leikur þeirra niður, það vantaði ákefð og gæði. Skiptingar í síðari hálfleik hleypti lífi í liðið en það var of seint. Eyjamenn hefðu þurft að byrja leikinn vel til að setja pressu á liðin í kringum þá.

Það gekk ekki og það vantaði einfaldlega of mikið upp á hjá liðinu í dag.

Keflvíkingar höfðu að litlu að keppa. Þeir spiluðu ágætlega en það fjaraði undan þeirra leik eftir því sem á leið.

Hvað gerist næst?

Bæði lið leika í Lengjudeildinni á næsta ári og munu eflaust reyna sitt besta til að tryggja sér sæti á meðal þeirra bestu á ný.

Eiður Aron: Raunveruleikinn er sá að við erum fallnir

„Mér fannst fyrri hálfleikurinn bara ömurlegur og svo veit ég ekki hvað gerist í markinu sem þeir skora. Við fáum fullt af færum í seinni hálfleik til að skora. Þetta var ekki okkar augnablik,“ sagði Eiður Aron Sigurbjörnsson varnarmaður ÍBV í viðtali við Vísi eftir leikinn í dag.

Eyjamenn áttu erfitt uppdráttar í fyrri hálfleik í leik þar sem mikið var undir.

„Við vorum að spila fyrir allt og ég veit ekki hvað ég á að segja. Maður er bara miður sín. Við erum fallnir og það er ömurlegt. Við sýnum ágætis frammistöður inn á milli en maður er ekkert að pæla í því núna.“

„Raunveruleikinn er sá að við erum fallnir og það kemst ekkert mikið annað í hausinn á mér núna.“

Haraldur Freyr: Keflavík á alltaf að vera með lið í efstu deilt

„Frammistaðan í fyrri hálfleik var mjög góð og í raun og veru þangað til við fáum á okkur jöfnunarmarkið, þangað til við fáum á okkur vítið. Við hefðum átt að skora 2-0 þegar við sleppum í gegn og gátum gert út um leikinn. Eftir markið slokknar aðeins á okkur, þeir fá fullt af fyrirgjöfum og færum,“ sagði Haraldur Freyr Guðmundsson þjálfari Keflavíkur eftir jafnteflið í Eyjum.

Eyjaliðið var ekki að spila vel í fyrri hálfleik og gerðu Keflvíkingar vel í að loka á heimamenn og stjórna leiknum að miklu leyti.

„Mér fannst við ná að loka ákveðnum svæðum og vörðumst mjög vel. Við beittum skyndisóknum og gerðum það vel. Við hefðum getað klárað sóknir okkar betur til að fá ekki sóknir á okkur á móti. Ég er ánægður með leikinn heilt yfir.“

Haraldur segist verða áfram með Keflavíkurliðið á næstu leiktíð og 

„Það verða örugglega einhverjar mannabreytingar á leikmönnum. Staðan er fín og að sjálfsögðu reynum við að fara beint upp aftur. Það verður ekki auðvelt verkefni en Keflavík á alltaf að vera með lið í efstu deild.“