Starfs­hópur skipaður til að finna lausnir á hús­næði fyrir Grind­víkinga

Frá þessu er greint á vef Stjórnarráðsins.

Skipunartími starfshópsins er frá 17. nóvember og skal hópurinn skila til ráðherra greinargerð og tillögum, eftir atvikum kostnaðarmetnum, eins fljótt og auðið er en þó í síðasta lagi fyrir lok janúar 2024.

„Hugur okkar er hjá þeim sem neyðst hafa til að yfirgefa heimili sín í Grindavík. Það er mikilvægt að við höfum hraðar hendur til að leysa húsnæðismál Grindvíkinga og draga úr þeirri óvissu sem nú ríkir,“ er haft eftir Sigurðurði Inga Jóhannssyni, innviðaráðherra.

Starfshópurinn á að:

• Kortleggja möguleika á uppbyggingu nýrra húsnæðiseininga og annarra nýskapandi lausna sem að framleiðsluaðilar hafa þekkingu á.
• Skilgreina kröfur til húsnæðis, þ.e. húsnæði skal vera af viðunandi gæðum, mæta þörfum íbúa varðandi aðstöðu og stærð, staðsetning skal uppfylla samfélagslegar, öryggis- og heilsukröfur um aðgengi að samgöngum, þjónustu og atvinnu.
• Greina mögulegar staðsetningar og lóðir fyrir uppbyggingu slíks húsnæðis. Greiningin skal ná til höfuðborgarsvæðisins, Reykjaness og nærliggjandi sveitarfélaga. Önnur sveitarfélög verði skoðuð eftir þörfum.
• Meta kostnað, innkaupaferli og annað sem tengist slíkri uppbyggingu, m.a. skipulagslega þætti og lagaumgjörð.

Og hann skipa:

• Kjartan Már Kjartansson, bæjarstjóri Reykjanesbæjar, formaður,
• Valdís Ösp Árnadóttir, sérfræðingur í innviðaráðuneytinu, verkefnisstjóri,
• Einar Þorsteinsson, formaður borgarráðs Reykjavíkurborgar,
• Fannar Jónasson, bæjarstjóri Grindavíkurbæjar,
• Guðmundur Axel Hansen, sérfræðingur í fjármála- og efnahagsráðuneytinu,
• Hermann Jónasson, forstjóri Húsnæðis- og mannvirkjastofnunar,
• Hólmfríður Bjarnadóttir, skrifstofustjóri í innviðaráðuneytinu,
• Jóhanna Klara Stefánsdóttir, sviðsstjóri mannvirkjasviðs Samtaka iðnaðarins,
• Jón Kjartan Ágústsson, svæðisskipulagsstjóri höfuðborgarsvæðisins, hjá Samtökum sveitarfélaga á höfuðborgarsvæðinu,
• Ólafur Árnason, forstjóri Skipulagsstofnunar,
• Óskar Jósefsson, settur forstjóri Framkvæmdasýslunnar – Ríkiseigna.