Kæra vin­kona Margrét Pála

Takk fyrir! Takk fyrir að helga líf þitt barnæsku og fjölskyldum þessa lands.

Síðustu 35 árin hefur þér tekist að skapa heildstæða og mannræktandi menntastefnu sem stuðlar að velferð barna og fjölskyldufólks í hvívetna. Þér hefur tekist að skapa faglegt lærdómssamfélag meðal jafningja, þar sem starfsfólk fær valdeflandi þjálfun og verkfæri sem tryggir sameiginlega sýn á það hvernig vinna skal að markmiðum skólastofnanna hér á landi samkvæmt lögum. Þeirri sameiginlegu sýn að allt sem við veljum að bjóða börnum upp á skuli fyrst og fremst þjóna þeirra hagsmunum, sem birtist skýrt og kjarnað í fyrstu meginreglu allra þeirra skóla sem starfa samkvæmt stefnunni.

Í þeim skólum sem stefnan þín er iðkuð af nákvæmni og sátt fá börn að alast upp í kærleiksríku, lýðræðislegu og skapandi námsumhverfi. Þau fá tækifæri til að þroska vitsmuni sína í gegnum leik, þar sem opinn efniviður og hæglæti í skipulagi og umhverfi stuðlar að litlu hljóð- og sjónáreiti sem býður upp á að þau upplifi þá galdra sem flæði í skapandi leik í raun og veru er.

Takk fyrir að sýna kjark með því að synda á móti samfélagslegum straumum sem hafa mótandi áhrif á stöðu einstaklinga út frá kyni, efnahag og þjóðerni. Fyrir það að móta stefnu sem leggur áherslu á að kenna ungum börnum að virða mörk hvers annars, og ekki síst að koma auga á og virða sín eigin landamæri, algjörlega óháð þessum samfélagslegu þáttum. Innan stefnunnar þinnar fá einstaklingar að blómstra á eigin forsendum og á gífurlega mikilvæg uppbótarvinna sér stað þegar kemur að jafnrétti kynjanna.

Takk fyrir að kenna okkur nægjusemi, sjálfbærni og seiglu og fyrir að leggja áherslu á mikilvægi þess að börnum sé boðið upp á náttúruleg leiksvæði utandyra, sem og efnivið úr náttúrulegum efnum innandyra. Fyrir það að koma auga á og standa með þeirri staðreynd að börn geta kennt okkur fullorðna fólkinu svo margt og að fyrirfram gefnar lausnir í leikefni geti í raun haft hamlandi áhrif á leik þeirra og þróun hans.

Þú ert einstök fyrirmynd kæra Margrét Pála, ferð fyrir sem leiðtogi með hugrekki og náungakærleik að vopni. Viðgengst óréttlæti, beitir þú kröftum þínum til að sporna gegn því. Þú leitar lausna sem virka fyrir öll börn og þar af leiðandi mannlegri tilvist; því börnin okkar eru það dýrmætasta sem við eigum og með því að byggja þeim traustan grunn eru meiri líkur á að framtíðin verði þeim björt. Í þínum skólum er gleði fagmennska, þarfir barna eru í fyrsta sæti og ef eitthvað í skipulaginu er á skjön við það, er það látið fjúka. Farsæld barna í sinni tærustu mynd.

Þér er annt um starfsfólk innan stefnunnar sem öll gegna starfi kennara á einn eða annan hátt. Skipulag og umhverfi tryggja fagleg afköst og veitir fólki tækifæri á lífsstílsgæðum sem víða er vöntun á. Lausnir þegar kemur að undirbúningstímum og vinnutímastyttingu eru m.a. partur af því og er stór þáttur í starfsánægju kennara sem innan skóla stefnunnar starfa. Það gerir þátttaka þeirra í faglegu lærdómssamfélagi á hverjum degi einnig og sú upplifun að tilheyra heild þar sem valdeflandi nálgun styrkir leiðtogahæfni og starfsþróun allra. Með aukinni starfsánægju eykst skuldbinding til vinnustaðarins og öll njóta.

Nálgun þín í málefnum barna og fjölskyldna er skólabókardæmi um það hvernig hægt er að sinna hlutverki riddara kærleikans af ástríðu og eldmóð sem svo skapar kjöraðstæður til samfélagslegrar sjálfbærni. Í þínum skólum mæta smáar og stórar manneskjur hlýlegu viðmóti þar sem orðræðan ýtir undir jákvæð og virðingarík samskipti. Í sameiningu láta skólarnir gott af sér leiða undir formerkjum stefnunnar.

Kæra vinkona Margrét Pála, takk fyrir að gefa okkur Hjallastefnuna.

Þínar vinkonur,

María Ösp og Tinna Björg, leikskólastýrur í Árbæ á Selfossi