Mildari tónn en sama inni­haldið: Sagði Evrópu „hlekkjaða af sektar­kennd og skömm“

Ræðan var nokkuð frábrugðin þeirri sem JD Vance, varaforseti Bandaríkjanna, hélt á sama viðburði fyrir ári síðan. Í það minnsta hvað varðar tón ræðnanna, þó í rauninni hafi ekki verið mikill munur á innihaldinu.

Rauði þráðurinn í gegnum ræður bæði Rubios og Vances var að Evrópa væri hnignandi og huglaus heimsálfa sem þyrfti að girða sig í brók og finna styrk sinn á nýjan leik í breyttum heimi.

Sjá einnig: Húðskammaði ráðamenn í Evrópu

Þeir Rubio og Vance, sem þykja líklegir til að keppast um tilnefningu Repúblikanaflokksins fyrir forsetakosningarnar 2028, virðast sammála um að hið svokallaða alþjóðakerfi sem Bandaríkjamenn byggðu í kjölfar kalda stríðsins heyri sögunni til.

Rubio sagði Bandaríkjamenn og Evrópumenn hafa gert sömu mistökin og nú þyrfti að lagfæra þau. Donald Trump, forseti Bandaríkjanna, hefði tekið sér leiðandi hlutverk í þeirri vinnu.

„Þess vegna göngum við Bandaríkjamenn stundum fram með beinskeittum og brýnum hætti. Þess vegna krefst Trump forseti alvarleika og gagnkvæmni frá vinum okkar hér í Evrópu.“

Í ræðu sinni talaði Rubio um að Bandaríkin vildu vinna með bandamönnum sínum í Evrópu en bandalagið þyrfti að breytast. Bandaríkjamenn vildu ekki veikburða bandamenn sem væru „hlekkjaðir af sektarkennd og skömm“.

„Við höfum engan áhuga á því að vera kurteisir umsjónarmenn falls vestursins,“ sagði Rubio.

Sagði Bandaríkin vilja vinasamband við Evrópu

Rubio sagði einnig að á tímum fyrirsagna þar sem endalok vinasambandsins yfir Atlantshafið væru boðuð, vildi hann koma því skýrt á framfæri að það væri ekki ósk Bandaríkjamanna. Heimili þeirra væri á vesturhveli jarðarinnar en Bandaríkin yrðu alltaf afkvæmi Evrópu.

Óhætt er að segja að þetta vinasamband yfir Atlantshafsbandalagið hafi beðið mikla hnekki á undanförnu ári. Ráðamenn í Evrópu hafa flýtt ætlunum sínum um að gera heimsálfuna sjálfstæðari frá Bandaríkjunum og spyrja sig nú sífellt meira að því hvort hægt sé að reiða á Bandaríkjamenn.

Að miklu leyti má rekja það til ræðu Vances í fyrra, nýjar þjóðaröryggisstefnu Bandaríkjanna þar sem farið er hörðum orðum um Evrópu, hótana Bandaríkjamanna í garð Grænlendinga og Dana og til þess að Trump hefur ítrekað beitt bandamenn Bandaríkjanna í Evrópu tollum.

Rubio tók fram í ræðu sinni að Bandaríkjamenn og Evrópumenn hefðu deilt og náð síðan sáttum í gegnum aldirnar og að þeir hefðu barist saman frá Kapyong í Kóreu til Kandahar í Afganistan.

„Ég er hér í dag til að gera ljóst að Bandaríkin eru að leggja línurnar að nýrri öld velmegunar og að, enn og aftur, viljum við gera það í sameiningu með ykkur, virtum bandamönnum okkar og okkar elstu vinum.“

Hlusta má á ræðu Rubios í spilaranum hér að neðan.