„Ég væri ekki að þessu nema það væri fyrir hana“

Hilmar bætti Íslandsmetið um heila 93 sentimetra með 78,03 metra kasti, sem kom honum í leiðinni inn á EM. Hann hafði verið að elta þetta met með misgóðum árangri síðustu sex ár en segir það ekki hafa komið á óvart að sjá metið falla um helgina.

„Æfingar hafa gengið mjög vel og það þurfti ekki kraftaverk til að fá þetta kast. Sætt að koma því út og gaman að framkvæma mótið svona vel. Það er búið að ganga mjög vel og ég hef séð bætingar þannig að ég vissi að metið myndi falla á einhverju móti, mjög sætt að geta gert það þarna [á Evrópubikarkastmótinu í Kýpur],“ segir Hilmar.

Þennan góða árangur að undanförnu skrifar Hilmar á flutning til Svíþjóðar en hann hefur búið þar í rúmlega ár, með góðan þjálfara og ekki endalaust einn á æfingu eins og þegar hann bjó á Íslandi.

„Ég var alltaf einn sko… Hér er fullt af fólki að æfa með mér og mjög góður hópur. Það er gott gengi hérna og einhvern veginn fann ég bara mitt hér. Hópurinn er með marga mjög góða íþróttamönnum og marga sem eru í kastgreinunum, það er góð stemning í hópnum.“

Fjölskylduna segir hann þó eiga mesta heiðurinn skilið en Hilmar er í sambúð og á tvö börn með Kristínu Karlsdóttur. 

„Konan mín er ótrúleg. Hún sætti sig við þetta, að flytja hingað út. Hún var kasólétt og við eignuðumst dóttur okkur hérna fyrir ári síðan. Hún hefur verið ótrúleg að halda öllu gangandi á heimilinu, á meðan ég er á æfingum eða einhvers staðar úti í heimi að keppa. Hún á mikið í þessu, eða mest í þessu bara. Ég væri ekki að þessu nema það væri fyrir hana.“

Fjallað var um sleggjukastarann og vel heppnaðan flutning hans til Svíþjóðar í Sportpakka Sýnar í gær. Innslagið má sjá í spilaranum að ofan.