Íranir skjóta á Ísraela

BBC greinir frá klukkan hálf átta að íslenskum tíma að Íranir hafi skotið eldflaugum í átt að Ísrael. Haft er eftir ísraelska hernum að þeir vinni að því að „stöðva ógnina“ og segja íbúum landsins að koma sér í skjól.

Samkvæmt umfjöllun AP eru viðvörunarsírenur í gangi í norðurhluta Ísraels. Heyra mátti í sprengjum þegar loftvarnarkerfi Ísraela hóf að verjast árásinni.

Israel Katz, varnarmálaráðherra Ísrael hefur sakað Írani um að brjóta gegn vopnahléinu, sem er nokkurra klukkustunda gamalt. Hann segist hafa skipað ísraleska hernum að bregðast við af hörku.

Vert er að minnast á að Íranir hafa ekki staðfest að þeir hafi framkvæmt árásina.

Donald Trump Bandaríkjaforseti tilkynnti í gærkvöldi að vopnahlé milli landanna væri í höfn. Ísraelar samþykktu vopnahléið í morgun en í nótt greindu íranskir miðlar að Íranir hygðust samþykkja vopnahléið ef Ísraelar myndu standa við það.

Fréttin hefur verið uppfærð.