Eitt vin­sælasta glæpa­hlað­varpið fjallar um morðið á Birnu Brjáns­dóttur

Morðið á Birnu Brjánsdóttur er tekið fyrir í nýjasta þætti hins vinsæla glæpahlaðvarps Crime Junkie, þar sem tekin eru fyrir morðmál, mannshvörf og sögur um raðmorðingja. Hlaðvarpið er það þriðja vinsælasta í Bandaríkjunum og annað vinsælasta á lista yfir hlaðvörp sem fjalla um glæpi.

Farið er ítarlega í mál Birnu í þættinum og vísa þær að mestu í greinar sem birtar voru um málið hjá Iceland Magazine, íslenskri fréttaveitu sem birtir fréttir á ensku, og Iceland Monitor, fréttaveitu mbl.is á ensku. Á vef Iceland Magazine fjalla þrjár af sex vinsælustu fréttanna um morðið á Birnu.

„Það sem kom fyrir Birnu þetta kvöld var glórulaust, hörmulegt og handahófskennt og það hefði getið gerst við hvert og eitt okkar. Svo, hafið það í huga að hugsa um hvert annað vegna þess að „við erum Birna“,“ segir Ashley Flowers, þáttastjórnandi Crime Junkie í lok þáttarins. Þá lýsir hún því hvernig íslenskt samfélag breyttist í kjölfarið og að fjöldi Íslendinga hafi deilt setningunni „Ég er Birna“ á samfélagsmiðlum.

Ashley Flowers og Brit Prawat, sem eru þáttastjórnendur Crime Junkie, fara yfir málsatvik og sérstaklega ferðir Birnu í miðbænum aðfaranótt laugardagsins 14. janúar 2017. Þær velta því sérstaklega fyrir sér hvers vegna vinir Birnu hafi skilið við hana niðri í bæ þar sem hún endaði ein í lok kvölds. Þá taka þær fram að miðað við þær upplýsingar sem þær hafi fundið sé það ekki óvenjulegt, eða að minnsta kosti hafi ekki verið áhyggjuefni og tala um það hve öruggt Ísland sé.

 Þær segja íslenskt samfélag hafa verið á hliðinni vegna málsins og að samfélagið hafi sameinast í leitinni að Birnu. Laugardaginn 14. janúar skrifaði móðir Birnu færslu á Facebook þar sem hún lýsti eftir dóttur sinni og dregur Ashley það fram að innan nokkurra klukkustunda hafi þúsundir verið búnir að deila færslunni.

Þá fjalla þær um myndbandið sem lögregla birti í kjölfar hvarfsins sem tekið var úr öryggismyndavélum á Laugavegi. „Hún virðist vita hvar hún er, hún virðist allavega ekki vera týnd. Á þriðju myndklippunni virðist hún vera komin úr miðbænum því hún er alein á götunni. Það er smá skrítið, því gatan virðist alveg yfirgefin. Þetta er skrítið, gatan er vel lýst en alveg mannlaus,“ segir Brit.

Þær halda áfram að rekja málsatvik og fjalla sérstaklega um það hvernig rannsóknin leiddi til þess að sjónum var beint að Polar Nanoq, grænlensks togara, og skipverjunum Thomas Møller Olsen og Nikolaj Olsen. Þær lýsa sérstaklega yfir aðdáun sinni á skipstjóra togarans sem sneri skipinu við þegar hann komst að því að lögreglan á Íslandi vildi ná tali á áhafnarmeðlimum skipsins. 

„Ég held svo mikið með skipstjóranum akkúrat núna,“ segir Brit þegar Ashley segir henni að hann hafi ákveðið að slökkva á nettengingunni til að koma í veg fyrir að áhafnarmeðlimir gætu lesið í fréttum hvers vegna hann hafi ákveðið að snúa skipinu við.

Umfangsmesta leitaraðgerð sögunnar

Tilkynnt var um hvarf Birnu þann 14. janúar 2017 en skipulögð leit hófst þann 16. janúar. Í millitíðinni höfðu fjölskylda og vinir Birnu ásamt sjálfboðaliðum hafið leit. Leitin að Birnu stóð yfir í viku og laugardaginn áður en hún fannst fór fram umfangsmesta leit sem björgunarsveitirnar hafa farið í; hátt í 500 björgunarsveitarmenn af öllu landinu tóku þátt í aðgerðum.

Lík Birnu fannst í fjörunni við Selvogsvita átta dögum síðar, þann 22. janúar. Almenningur tók virkan þátt í leitinni og var það til dæmis almennur borgari sem fann skó Birnu við höfnina í Hafnarfirði tveimur dögum eftir að hún hvarf. Sá fundur reyndist afar mikilvægur fyrir rannsókn málsins.

Grænlenski skipverjinn Thomas Møller Olsen var dæmdur í 19 ára fangelsi fyrir morðið á Birnu og hefur hann verið fluttur úr landi og til Danmerkur eftir að leyfi fyrir flutningunum fékkst frá dönskum yfirvöldum. Thomas er vistaður í stærsta fangelsi Danmerkur, Vestre í Kaupmannahöfn. Ekki liggur fyrir hvort hann muni afplána refsingu sína alfarið í Vestre.

Ökuskírteinið og úlpa Thomasar lykilsönnunargögn

Thomas var með rauðan Kia Rio-bíl á leigur þegar Birna hvarf og var á ferð í miðbænum með öðrum skipverja aðfaranótt 14. janúar. Viðurkenndi Thomas í fyrstu yfirheyrslu hjá lögreglu að hafa tekið Birnu upp í bílinn í miðbænum þá um nóttina en bar að önnur stúlka hafi einnig komið upp í bílinn.

Lögreglan lýsti eftir Kia Rio-bifreiðinni mánudaginn 16. Janúar og fannst hún daginn eftir í Kópavogi. Hald var lagt á bílinn og hann rannsakaður ítarlega í kjölfarið en í honum fannst mikið af blóði sem reyndist vera úr Birnu.

Meðal annarra gagna málsins er ökuskírteini Birnu um borð í Polar Nanoq, skipinu sem Thomas var skipverji í, með fingrafari Thomas. Þá fannst blóð úr Birnu á úlpu hans auk þess sem þekjufrumur Thomas og Birnu fundust á reimum úr skóm hennar.

Lögreglu grunaði fljótlega að Birnu hefði verið ráðinn bani þar sem Thomas og hinn skipverjinn sem einnig var úrskurðaður í gæsluvarðhald í upphafi voru settir í varðhald grunaðir um manndráp. Thomas var hins vegar einn ákærður fyrir morðið.

Hægt er að hlusta á þátt Crime Junkie hér að neðan.